Dagur íslenskrar náttúru var haldinn hátíðlegur í Þórsmörk í Neskaupstað þann 16. september, en deginum er ætlað að stuðla að aukinni vitund um náttúru Íslands og mikilvægi þess að vernda hana og varðveita.
Starfsmenn Náttúrustofu Austurlands buðu skólakrökkum og almenningi að kynnast fjölbreyttu lífríki í ferskvatni og fjöru. Gestir gátu skoðað ýmsar kynjaverur í víðsjá og með berum augum. Hornsíli og tjarnatítur úr Hólatjörnum voru til sýnis í búri og vöktu mikla lukku, sérstaklega hjá yngri kynslóðinni.

Fjörudýr voru höfð í fötum með sjó þar sem gestir gátu skoðað þau og handleikið. Þar mátti meðal annars finna marflær, krækling, klettadoppur og fleiri algeng fjörudýr.

Einnig var þang úr fjörunni til sýnis og tegundunum raðað eftir því hvar þær er helst að finna í fjörunni. Mismunandi þangtegundir mynda gjarnan greinileg belti frá efri hluta fjörunnar og niður að sjó. Þang sem vex ofarlega í fjörunni þarf að þola að vera lengi á þurru þegar fjarar út, á meðan tegundir neðar í fjörunni eru lengur á kafi.

Í víðsjánni gátu gestir skyggnst inn í hinn smáa heim dýranna sem lifa í ferskvatni og sjó, þar sem margs konar smádýr eins og rykmýs- og bitmýslirfur, flatormar, ánar, brustaormar og krabbadýr komu í ljós og opnuðu augu gesta fyrir fjölbreytileikanum sem lifir í ferskvatni og fjöru. Þá voru gestir hvattir til að túlka íslenska náttúru með hvers konar listrænni nálgun.

Náttúrustofa Austurlands þakkar Menningarstofu Fjarðabyggðar fyrir skemmtilegt samstarf á þessum degi og öllum áhugasömu gestunum fyrir þátttökuna

Dregið var úr þátttakendum í lok dags og hlutu þrjú heppin glaðning frá Náttúrustofu og Menningarstofu, fuglaspil og orðaspil, þau heppnu eru,  Íris Arney úr 4. Bekk, Kristín Aðalheiður og Rúrik Atli úr 2. bekk. Nesskóla. 
Ljósmyndir: Sveinn Fannar Sæmundsson og starfsfólk Náttúrustofu Austurlands

Síðastliðnar vikur hafa sérfræðingar Náttúrustofu Suðausturlands unnið að rannsókn á smádýralífi í leirunum í Skarðsfirði. Tilgangurinn er að fá yfirlit á lífríki svæðanna en sambærileg rannsókn var gerð á leirum Skarðsfjarðar árið 1979. Fyrir þetta verkefni leitum við að ljósmyndum af Skarðsfirði á fjöru, sem teknar voru á árunum 1970-1990. Slíkar myndir hjálpa til að öðlast betri sýn í ástand svæðisins á því tímabili og framvindu leiranna í Skarðsfirði til okkar daga. Myndir má senda stofunni á Facebook, á netfangið hoffy@nattsa.is eða koma með þær á skrifstofur starfsmanna á vesturgangi neðri hæðar í Nýheimum.

The post Náttúrustofan óskar eftir ljósmyndum appeared first on Nattsa.is.

Nú er veiðitímabil heiðagæsa hafið. Náttúrustofa Austurlands er með GPS senda á rúmlega 20 heiðagæsum víðsvegar um heiðar Austurlands.

Við viðjum því biðla til gæsaskytta að hlífa merktum gæsum ef hægt er. Við gerum okkur þó grein fyrir því að erfitt getur verið að koma auga á senda í rökkri og því getur komið fyrir að merktar gæsir séu skotnar.

Ef það kemur fyrir að merkt gæs er skotin biðjum við viðkomandi veiðimann koma sendi aftur til Náttúrustofunnar. Sendar sem eru í heilu lagi eru nýttir aftur, en gögnin sem safnast frá þessum sendum eru okkur afar mikilvæg.

Náttúrustofa Austurlands Tjarnarbraut 39b á Egilsstöðum.
Náttúrustofa Austurlands Bakkavegi 5 í Neskaupstað.