Heiðagæsirnar eru mættar aftur
Síðastliðið sumar voru 30 heiðagæsir merktar á Fljótsdalsheiði, Eyjabökkum og Vesturöræfum með GPS-hálskrögum. Síðustu daga hafa fjölmargar heiðagæsir skilað sér aftur heim til Íslands eftir vetursetur á Bretlandseyjum og þar á meðal nokkrar af merktu gæsunum.
Þegar þetta er skrifað hafa 21 gæs skilað sér aftur heim. Ein þeirra lenti greinilega í hremmingum á leið sinni en hún tók stóran sveig austur fyrir land áður en leið hennar hélt norðvestur og svo aftur suður á leið og lenti aftur til Íslands á Melrakkasléttu. Hún var í rúmann sólarhring að ná aftur föstu landi eftir að hafa hvílt sig úti á sjó fyrir norðan land örlitla stund áður en hún hélt aftur af stað. Nú er hún í góðu yfirlæti í Mývatnssveit.
Ein gæsin tók sér ágætis stopp hjá frændum okkar í Færeyjum, en hún hélt beint á Vágarflugvöll til lendingar áður en hún skoðaði sig um við stærsta vatn Færeyja, Sørvágsvatn. Þaðan tók hún stefnuna til Íslands þar sem hún lenti í Norðfirði áður en hún hélt áfram að færa sig nær heimaslóðum og er nú komin inn í Fljótsdal.
Tvær gæsanna komu upp á Hérað en voru greinilega ekki alveg tilbúnar að koma heim strax og héldu á Suðausturlndið í nágrenni Hafnar. Önnur þeirra skilaði sér aftur nær heimahögum og heldur nú til í Skriðdal á meðan hin tók stefnuna vestur. Hún skoðaði sig um á Mælifellssandi og flaug yfir Fjallabak áður en hún ákvað að hvíla sig vestan við Hellu.
Allar hinar halda sig hér og þar um landið, flestar áttu ekki í neinum vandræðum með ferðina og komu að landi á Suðausturlandi. Allar voru merktar á meðan þær voru í felli og því er ekki vitað hvar þær verptu nákvæmlega og verður því spennandi að sjá hvort þær haldi aftur á heimaslóðir nú í vor.
Síðastliðinn miðvikudag, 25. mars, var 13. ársfundur Náttúrustofu Suðausturlands haldinn í Nýheumum á Höfn í Hornafirði. Farið var yfir ársskýrslu og ársreikning stofunnar árið 2025 auk þess sem helstu verkefni síðastliðins árs voru kynnt. Auk venjubundinna fundarstarfa flutti starfsfólk stofunnar erindi úr starfi stofunnar.